Тошкент ахборот технологиялари университетида «Бунёдкорлик эпопеяси» фильми премьераси бўлиб ўтди
26 ноябрь куни Тошкент ахборот технологиялари университетида «Ўзбеккино» Миллий агентлиги буюртмаси билан Илмий-оммабоп ва ҳужжатли фильмлар киностудиясида тасвирга олинган «Бунёдкорлик эпопеяси» ҳужжатли фильмининг премьераси бўлиб ўтди, деб хабар бермоқда «Ўзбеккино» Миллий агентлиги расмий сайти.
Фильм ғояси муаллифи, журналист Ҳусан Эрматов фильмнинг яратилишига Ўзбекистонда хизмат кўрсатган маданият ходими, таниқли фотограф Абдуғани Жуманинг Тошкент фотография уйида намойиш этилган «Бунёдкорлик эпопеяси» фотокўргазмаси туртки бўлганини қайд этди.
«Ушбу фотокўргазма Тошкент шаҳрида бунёд этилган Ҳазрати Имом мажмуи, Ўзбекистон Халқаро анжуманлар саройи сингари объектлардаги қурилиш жараёнини бошдан-оёқ акс эттиргани билан қимматлидир. Бундан илҳомланган ‘Ўзкинохроника’ ижодкорлари ушбу жараённи 5000 дан зиёд фотокадрга муҳрлаган фотографга бағишланган ҳужжатли фильм яратди», — деди у.
«Бунёдкорлик эпопеяси» фильми намойиш этилгандан сўнг, ижодкорлар талабалар саволларига жавоб берди.
«Фотограф бўлиш учун одам уқув ва билим баробарида жараённи ҳис қила билиши ҳам керак. Унинг маҳорати кўп жиҳатдан ҳолатни рост тутиб қола билишида. Шундагина у фотографияни тасвирий фотография санъатига айлантира олади. Фотография тарихни яратади», — деди Абдуғани Жума.
Фильм ижодкорлари гуруҳи:
- Сценарий муаллифи — Дилфуза Кузиева
- Режиссёр — Сардор Тўлаганов
- Оператор — Анвархон Қосимов
- Композитор — Жамшид Изамов.
