АҚШлик ўсмирнинг полиция томонидан ўлдирилиши натижасида бўлган тартибсизликларда 400 киши ҳибсга олинди
АҚШнинг Фергюсон (Миссури штати) ва бошқа шаҳарларида давом этаётган оммавий намойишлар натижасида полиция 400 дан ортиқ кишини ҳибсга олди. Бу ҳақда маҳаллий ОАВларга таяниб, Interfax хабар берди.
Тартибсизликларга АҚШнинг Миссури штати Сент-Луис суди август ойида 18 ёшли афро-америкалик ўсмирни отиб қўйгани учун ҳибсга олинган полициячи Даррен Уилсонни оқлагани сабаб бўлди.
Намойишлар жами 38 та штатда бўлиб ўтди. Айни дамда намойишчиларни АҚШнинг Вашингтон, Нью-Йорк, Чикаго ва Сиэтл сингари йирик шаҳарларидаги аҳоли қўллаб-қувватламоқда.
АҚШ президенти Барак Обама Фергюсондаги тартибсизликларни оқлаб бўлмаслигини, айбдорлар жазоланиши кераклигини таъкидлади.
Миссури ҳукумати тартиб ўрнатиш учун чоралар қўлламоқда. Штат губернатори Жей Никсон суд ҳукми эълон қилиниши арафасида фавқулодда вазият режимини жорий қилди, бу унга тартибсизликларга қарши курашга Миллий гвардияни жалб этиш имконини берди.
Эслатиб ўтамиз, август ойида 18 ёшли қоратанли ўсмирни отиб қўйгани учун қамоққа олинган полициячи Даррен Уилсоннинг оқлангани 25 ноябрь куни эрталаб АҚШнинг Миссури штати Сент-Луис суди прокурори Боб Маккалок томонидан маълум қилинди.
