Португалиянинг собиқ бош вазири коррупцияда айбланиб қўлга олинди

Португалияда расмийлар мамлакатнинг собиқ бош вазири Жозе Сократешни қўлга олди. Бу ҳақда Португалия прокуратурасига асосланиб Diaro de Noticias хабар бермоқда.

2005−2011 йилларда ҳукуматга раҳбарлик қилган Сократеш 21 ноябрь куни Париждан учиб келган вақтда Лиссабон халқаро аэропортида қўлга олинган. У солиқ тўлашдан қочиш, бюджет маблағларини ноқонуний ўзлаштириш ҳамда коррупцияда айбланмоқда. Ундан ташқари яна уч киши қўлга олингани айтилган.

Шунингдек, жамоат хавфсизлиги полицияси, солиқ ва божхона органларининг бир неча ходимлари иштирокида турли жойларда қидирув ишлари бошланган.