ЎзМТРК вакиллари Осиё ва Тинч Океани телерадиоэшиттирувчилар уюшмаси Бош Ассамблеясида қатнашди
Ўзбекистон миллий телерадиокомпаниясининг расмий делегацияси Хитой Халқ Республикасининг Макао шаҳрида бўлиб ўтган Осиё ва Тинч Океани телерадиоэшиттирувчилар уюшмасининг (Asia-Pacific Broadcasting Union − ABU) навбатдаги 51-Бош Ассамблеясида қатнашди. Бу ҳақда Миллий телерадиокомпания расмий сайти хабар берди.
Бош Ассамблея доирасида конференция, семинар, форум ва қўшма йиғилишлар бўлиб ўтди. ABU тизимидаги турли бўлинмаларнинг қўшма йиғилишларида телерадиоэшиттириш соҳасида янги техника ва технологияларни қўллаш ва дастурларни айрибошлаш, шунингдек, спорт гуруҳининг йиғилишида йирик спорт мусобақаларини ёритишда янги услубларни қўллаш ҳамда уларни намойиш этиш хуқуқини сотиб олиш бўйича долзарб масалалар муҳокама этилди.
Ўзбекистон миллий телерадиокомпанияси вакили ўз чиқишида йиғилиш қатнашчиларига Компаниянинг бугунги кундаги фаолияти, тизимдаги телерадиоканаллар ва Ўзбекистонда оммавий ахборот воситаларини ривожлантириш соҳасида амалга оширилаётган ислоҳотлар ҳақида батафсил маълумот берди. Европа ва Осиё телерадиоэшиттириш компаниялари вакиллари Ўзбекистонда телерадио соҳасининг ривожланиши, Ўзбекистон миллий телерадиокомпаниясида амалга оширилаётган янги лойиҳалар, ишлаб чиқариш ва техник базасини янгилаш ҳамда телерадиодастурларининг мазмуни ва сифатини ошириш, Ўзбекистонда ахборот-коммуникация технологиялари, жумладан, рақамли телевидениени ҳаётга тадбиқ этиш борасида амалга оширилаётган чора-тадбирлар ҳақида кенг маълумотга эга бўлдилар.
Ўз навбатида МТРК вакиллари Европа ва Осиё телекомпаниялари тажрибаси асосида рақамли телевидениега ўтишнинг техник жиҳатлари билан танишдилар. Шунингдек, Ўзбекистонда рақамли телевидениега ўтиш бўйича давлат дастурини амалга ошириш юзасидан хорижий мутахассислар билан фикр алмашилди.
Телерадиокомпаниялар раҳбарлари ўртасида бўлиб ўтган учрашув ва музокаралар давомида технологияларни такомиллаштириш билан боғлиқ масалалардан ташқари, ўзаро телерадиодастурларни айрибошлашнинг ташкилий-ҳуқуқий масалалари, шунингдек соҳа вакилларини ўқитиш ва қайта ўқитиш масалалари ҳам кўриб чиқилди. Жумладан, Германиянинг йирик жамоат телердиоэшиттирувчилар Консорциуми (ARD) Ўзбекистон миллий телерадиокомпанияси билан англашув меморандуми доирасида икки томон маданий ва ижтимоий ҳаётига оид ахборот лавҳаларини ўзаро айрибошлаш бўйича ҳамкорлик қилиш истагини билдирди. Европа ва Осиёнинг йирик телерадиоташкилотлари Ўзбекистон миллий телерадиокомпанияси билан яқиндан ҳамкорлик ўрнатиш ва ривожлантириш ниятини билдирди.
Осиё ва Тинч Океани телерадиоэшиттирувчилар уюшмаси (ABU) 1964 йил 1 июлда ташкил топган бўлиб, унинг фаолияти сиёсий ва тижорат мақсадларига қаратилмаган. Ташкилотнинг асосий мақсади − Осиё ва Тинч Океани минтақаси ҳудудида телерадиоэшиттирувчи ташкилотларни ривожлантиришга кўмак беришдан иборатдир. Ҳозирги кунда уюшмага дунёнинг 63 мамлакатидан 255 та ташкилот аъзодир. Ўзбекистон миллий телерадиокомпанияси 2004 йилдан бошлаб ABU’нинг тўла ҳуқуқли аъзосидир.
