13—17 октябрь кунлари Ўзбекистон Республикаси Парвозлар хавфсизлигини назорат қилиш давлат инспекцияси авиация ҳодисалари ва фавқулодда ҳодисалар бўйича терговчиларни тайёрлаш курсларини ўтказди. Бу ҳақда инспекция матбуот хизмати хабар бермоқда. Курслар Дававианазорат асосий тадбирлар ва авиация ҳодисалари профилактикаси, анализи, ҳисоби ва тергов қилиш бўлимининг 2014 йилги Режасига асосан ташкил қилинди.
Ушбу курсларнинг мақсади фуқаро авиацияси учувчи мутахассислари, муҳандис-техникларидан, парвоз ҳаракатини бошқариш, Ўзбекистон Республикаси барча авиакомпанияларига парвозларни таъминлаш, атрофдаги аэропортларда парвоз хавфсизлигини таъминлаш бўйича инспекторлардан терговчиларни тайёрлашдир.
Ўқув жараёнида тингловчилар тергов мақсади ва вазифалари, мавжуд ҳуқуқий база, тергов олиб бориш ва ташкиллаштиришнинг амалдаги тизими, тергов бўйича комиссиянинг ишлаш тартиби, авиация ҳодисаларини таснифлаш, терговда қўлланиладиган замонавий услублар, тергов олиб бориш ва ташкиллаштириш бўйича амалий малакалар, тергов материалларини расмийлаштириш бўйича етарли назарий билимлар олишди.
Курс жараёнида олинган билимларни текшириш натижасида тингловчилар авиация ҳодисалари ва фавқулодда ҳодисаларни тергов қилишда иштирок этиш ҳуқуқини берувчи Сертификат билан тақдирланишди.
Изоҳ (0)