Facebook ижтимоий тармоғи асосчиси Марк Цукерберг Пекиндаги Циньхуа университети иқтисодиёт ва менежмент мактаби талабалари олдида хитой тилида чиқиш қилди, деб хабар бермоқда «Ведомости».
Ушбу мактабнинг маслаҳат кенгашига аъзо бўлган тадбиркор учрашув чоғида нафақат баёнот қилган, балки иштирокчиларнинг саволларига ҳам жавоб берган. Цукерберг фақатгина хитой тилида гапирган, гарчи унинг аксент билан сўзлагани тушунишни қийинлаштирган бўлса ҳам, талабалар барибир ҳайратда қолган.
Учрашув чоғида Цукерберг ўтган йили ўз компаниясига 20 нафар хитойлик талаба ишга олингани ва келажакда хитойлик муҳандисларни олишни режалаштираётганини маълум қилган. Хитойда Facebook’га кириш тақиқланганига қарамай, компаниянинг Гонгконгдаги офиси хитойлик тадбиркорлар учун реклама имкониятларини тақдим этаётганини айтиб ўтган.