Озиқ-овқат маҳсулотларига қўйилган эмбаргога қарамай, Европадан Россияга келтирилган 20 тонна атрофидаги гўшт ва ичак-човоқлар дам олиш кунлари Россия Федерацияси жанубидаги Новороссийск порт-шаҳри яқинида жойлашган полигонда ёқиб юборилди. Бу ҳақда «РИА Новости» хабар бермоқда.
«Россельхознадзор» бошқармаси вакили Екатерина Черницованинг маълум қилишича, гўшт партияси Қрим яриморолидан Новороссийскка юк автомобилида 14 сентябрь куни келтирилган.
Автомобиль текширилганда, унда расман қайд этилган «Қора денгизнинг музлатилган килкаси»дан ташқари, хорижда ишлаб чиқарилган чўчқа ва парранда ичак-човоқлари топилган. Ҳайдовчида эса мазкур маҳсулотларни Россияга олиб киришга рухсат берувчи керакли ҳужжатлар бўлмаган.
Аниқланишича, ичак-човоқлар Буюк Британиядан, гўшт эса Бельгиядан олиб келинган. Зарур ҳужжатлар тақдим этилмагани туфайли, «Россельхознадзор» бошқармаси вакили сўзларига кўра, «хавфли маҳсулотларни йўқ қилиш ҳақида қарор қабул қилинган».
Барча маҳсулотлар Новороссийскда жойлашган Глебовское қишлоғидаги полигонда ёқиб юборилди. Хабар берилишича, айни дамда Санкт-Петербургга йўл олиши керак бўлган мазкур юкни жўнатган ёки қабул қилиб олган кишиларни жавобгарликка тортиш масаласи кўриб чиқилмоқда.
Эслатиб ўтамиз, Россия президенти Владимир Путин Россияга қарши иқтисодий санкциялар жорий этган мамлакатлар — АҚШ, Евроиттифоқ давлатлари, Канада, Австралия ва Норвегиядан қишлоқ хўжалиги маҳсулотлари, хомашё ва озиқ-овқат импорт қилишни тақиқлаш тўғрисидаги фармонни жорий йилнинг 7 август куни имзолади. Фармонга биноан ушбу тақиқ кучга кирган кунидан бошлаб бир йил амалда бўлади.