Хитойда ўз лавозимларида номигагина турган 162 минг нафар сохта амалдорлар ишдан бўшатилди, деб хабар бермоқда ТАСС. Давлат муассасалари ва корхоналари раҳбарлари бундай ҳолатга яна йўл қўйилган тақдирда бюджетдан молиялаштириш тўхтатилиши ҳақида огоҳлантирилди.
«Жэньминь Жибао» нашрининг маълум қилишича, сўнгги ўнйилликларда Хитойда ўтказилган иқтисодий ислоҳотлар давомида давлат корхоналари ва муассасаларида ёппасига янги бўлимлар тузилган. Кўпинча раҳбарлар бундай бўлимларга ўз қариндошлари ва танишларини жойлаштириб қўйган. Улар иш жойига деярли келмаса ҳам, маош олган ва хизмат машинасидан фойдаланган. Сохта амалдорлар ишдан бўшатилгач, хизмат автомобиллари сони 120 мингга қисқарган.
Хитойда коррупцияга қарши кураш кампанияси ҳокимиятга 2012 йил сўнгида «бешинчи авлод» деб аталаётган раҳбарлар келиши билан бошланган. Хитойнинг янги етакчиси Си Цзиньпин амалдорлардан қимматбаҳо буюмлар, кўнгил очиш ва хизмат сафарларига кетадиган харажатларни қисқартиришни талаб қилиб, қиммат совғалар олишга чекловлар қўйган.