Олий лиганинг 19 ва 21-турларидан ўрин олган «Сўғдиёна» — «Навбаҳор» ҳамда «Сўғдиёна» — «Металлург» учрашувларида қайд этилган 5:4 ҳисоблари кўпчиликни ажаблантириш билан бир қаторда эътироз ва гумонларга сабаб бўлди, деб хабар бермоқда Stadion.uz.
Мураббийларнинг ўзи Зоминдаги стадионда футбол ўйнаб бўлмайди, деб турган бир вазиятда жиззахликлар икки учрашувда рақиблар дарвозасини 10 марта ишғол қилиши ажабланарли ҳолатдир. Ваҳоланки, бу стадионда чемпионликни кўзлаётган, таркибида тажрибали футболчилар тўп сурадиган «Локомотив» иккитагина гол урганди. «Нефтчи» эса умуман голсиз қайтган. Хўп, жиззахликлар мезбон сифатида майдонга кўникиб олган дерсиз, унда «Навбаҳор» ва «Металлург» футболчилари-чи?
Демак, мазкур жамоалар таркибида тўп сураётган футболчилар маҳорат бобида «Пахтакор», «Локомотив», «Бунёдкор», «Насаф» аъзоларидан ўтиб кетибди-да! Энди Ўзбекистон терма жамоаси таркибини ёппасига «Сўғдиёна», «Металлург» ва «Навбаҳор» футболчилари билан тўлдирса бўлаверар экан-да!?
Хуллас, маълум қилинишича, бу учрашувлар ФИФАнинг ҳам эътиборини тортган ва беллашув ёзилган дискни сўраган. Қолганини вақт кўрсатади.
Албатта буларнинг барчаси миш-миш, аммо миш-миш бўлмаслиги ҳам мумкин, деб қайд этди Stadion.uz.
Изоҳ (0)