Чеченистон пойтахти Грозний шаҳрида террорчилик ҳаракатига чек қўйиш вақтида тўрт нафар полициячи ҳалок бўлди. Бу ҳақда Россия ИИВ матбуот хизматига таяниб, Interfax хабар бермоқда.
Маълум бўлишича, 5—октябрь Грозний шаҳри куни муносабати билан концерт ўтказиладиган залга кираверишда ўрнатилган металлни аниқловчи детектор ёнида ўз хизмат вазифасини ўтаётган полиция ходимлари шубҳали йигитни пайқаб қолган. Полициячилар уни текшириб, шахсини аниқламоқчи бўлганида, йигит ўзини портлатиб юборган.
Портлаш натижасида ИИВ ББнинг тўрт нафар ходими ҳалок бўлди, яна етти нафари жароҳат олди. Концертга келган кишиларнинг ҳеч бири жабр кўрмаган.
Бироқ баъзи ОАВлар ҳалок бўлганлар сонини бешта деб эълон қилди. «Кавказская политика» нашри ёзишича, тўрт полициячидан ташқари, бир нафар тинч фуқаро ҳам қурбон бўлган.
ИИВ террорчининг шахси аниқланганини маълум қилди. У Старопромисловский туманида яшовчи, уйидан икки ой аввал чиқиб кетиб, бедарак кетган фуқаро бўлиб чиқди.
Айни пайтда портлаш рўй берган жойда Федерал хавфсизлик хизмати ва полиция ходимлари иш олиб бормоқда.
Изоҳ (0)