Қорақалпоғистон Республикасида суғориладиган ерларнинг мелиоратив ҳолатини яхшилаш борасида муайян ишлар амалга оширилмоқда. Ислом Каримовнинг 2013 йил 19 апрелда қабул қилинган «2013—2017 йиллар даврида суғориладиган ерларнинг мелиоратив ҳолатини янада яхшилаш ва сув ресурсларидан оқилона фойдаланиш чора-тадбирлари тўғрисида»ги қарори бу борада муҳим дастуруламал бўлиб хизмат қилмоқда, деб хабар беради Ўзбекистон Миллий ахборот агентлиги.
Ўтган йили 652 километр хўжаликлараро канал, тўрт минг километрдан ортиқ ички хўжалик суғориш тармоқлари қазилди. 2636 гидротехник иншоот ва сув ўлчаш пости таъмирланиб, сув сатҳини ўлчовчи қурилмалар ўрнатилди.
«Жорий йилда ҳам бу борадаги ишлар изчил давом эттирилмоқда, — деди Қуйи Амударё ирригация тизимлари ҳавзаси бошқарма бошлиғи ўринбосари Д.Тўлибоев. — Дастурга мувофиқ, шу йилнинг дастлабки олти ойида 416,9 километр узунликдаги магистрал ва хўжаликлараро каналларни қазиш, 168 гидротехник иншоот ва 115 сув ўлчаш постларида жорий таъмирлаш ишлари бажарилди. Фермер хўжаликларининг 2500 километрдан ортиқ ички суғориш тармоқлари тозаланди».
Йил якунига қадар Қорақалпоғистон Республикасидаги еттита ирригация объектида реконструкция ишларини амалга ошириш режалаштирилган бўлиб, бунинг учун 12 миллиард 414 миллион сўм маблағ ажратилди. Жорий йилнинг ўтган даврида саккиз миллиард сўмликдан ортиқ иш бажарилиб, 22,5 километр узунликдаги канал ва 52 сув ўтказувчи қурилма реконструкция қилинди.