Украина президенти Пётр Порошенко Малайзия «Боинг»ининг қулаши учун жавобгарликни россияпараст айирмачиларга юклаб, уларни «террорчилар» деб атади. Бу ҳақда Украина президентининг расмий сайтида эълон қилинган украиналикларга мурожаатида сўз боради, деб хабар берди «Кун».

«Бугун террорчилар битта зарба билан қарийб 300 кишини ўлдиришди. Улар орасида аёллар, болалар, кўплаб мамлакатларнинг фуқаролари бор эди», — деган Порошенко ҳалок бўлганларнинг оила аъзолари ва яқинларига ҳамдардлик билдирди.

Украина президенти авиаҳалокат сабабларини ўрганиш бўйича махсус комиссия тузиш, унинг таркибига Халқаро фуқаро авиацияси ташкилоти (IKAO), шунингдек, Голландия, Малайзия ва АҚШ мутахассисларини жалб этиш ҳақида кўрсатма берди.

Айни вақтда, Порошенко қулаган «Боинг»нинг қора қутилари Москвага топширилишига қарши чиқди. Унинг фикрича, россияпараст айирмачилар шу йўл билан ўз айбини ювишга ҳаракат қилади.

Бундан ташқари, Украина президенти Россияни агрессияда айблаб, унинг бутун ҳудуди ўққа тутилаётгани ва Украина самолётлари уриб туширилаётганини маълум қилди.

«Бугун бутун жаҳон агрессорнинг асл башарасини кўрди, чунки тинч самолётни уриб тушириш — бутун жаҳонга қарши қаратилган халқаро террорчилик ҳаракати ҳисобланади», — деди Украина етакчиси.

Эслатиб ўтамиз, Донецк вилоятида Malaysia Airlines самолёти қулагани ҳақидаги ахборот Тошкент вақти билан 20:00 атрофида пайдо бўлди. Маълумотларга кўра, ҳалокат натижасида самолёт бортида бўлган барча 298 киши ҳалок бўлган.

Аввалроқ, юз берган воқеада Россия президенти Владимир Путин Украинани айблаб чиққанди.