Англиянинг жануби-ғарбидаги Корнуолл графлигида денгизга чўкаётган 18 ёшли йигит Facebook’ка жойлаган SOS-хабари туфайли омон қолди. Бу ҳақда Daily Mirror нашри маълум қилди.
Йигитнинг қайиғи сувга ағдарилиб кетганда, унинг мобил телефонининг қуввати кам бўлган. Йигит дарров «Хавф остида» деган сўзларни ёзиб, Facebook’ка жойлаган. Бу вақтда «онлайн» бўлган йигитнинг дўсти тезликда унинг онасига қўнғироқ қилган.
Аёл қирғоқбўйи қутқарув хизматига телефон қилиб, бахтсиз ҳодисадан огоҳ этади ва қутқарув ишлари амалга оширилишини талаб қилади.
Қутқарувчилар йигитни икки соатдан сўнг соҳилга олиб чиқишга муваффақ бўлди ва шифохонага олиб борди. Шифокорлар узоқ вақт мобайнида 15—16 даражали сувда бўлганига қарамай, йигитнинг ҳаётига ҳеч нарса хавф солмаётгани ҳақида хабар берди.
Қутқарувчиларнинг айтишича, интернетга уланишда йигитнинг омади келган, негаки денгиз тугул қирғоқбўйида ҳам алоқа яхши эмас. Бу ҳақда Корнуолл графлигида вақт ўтказишни ёқтирадиган Буюк Британия бош вазири Дэвид Кэмерон ҳам тез-тез шикоят қилиб туради.
Изоҳ (0)