Зангиота тумани, Келес шаҳри ҳокими ўринбосари Дилмурод Муҳамедов туманда қандайдир махлуқ пайдо бўлгани ҳақидаги хабарлардан ҳайрон бўлди ва бундай мавжудот борлигини рад этди. Бу ҳақда UZ24 хабар бермоқда, деб ёзади «Кун».
Ҳоким ўринбосарининг сўзларига кўра, бу катта эҳтимол билан болалар ёки ўсмирлар томонидан ўйлаб чиқилган бир ҳазил бўлиши мумкин, холос.
Шунингдек, Келес шаҳри ички ишлар бўлими ҳам ҳеч қандай «махлуқ» йўқлигини, бу кимнингдир қўпол ҳазили эканлигини маълум қилган.
UZ24’нинг қайд этишича, ҳозирги вақтда ҳуқуқни муҳофаза қилиш органлари ҳодиса тафсилотларини аниқламоқда ва безориларни топишга уринмоқда.
Ўз навбатида, Sayyod.uz’нинг хабар беришича, 6 июль, якшанба куни Келес йўлидаги кўприкда 200 га яқин одам тўпланган, милиция ходимлари уларни тарқатиш билан машғул бўлган.
Sayyod.uz мухбирининг маълум қилишича, одамлар орасида ваҳима уйғонишига сабаб бўлган ушбу миш-мишларни ким тарқатгани аниқлашга ҳаракат қилинган ва 2-3 нафар ўсмир қўлга олинган. «Бироқ бирорта факт йўқ, униси бу дейди, буниси бу», — деб ёзади сайт.
Келесда қандайдир «махлуқ» томма-том юриб, одамлар тинчини бузиб, тош отиб юргани ҳақидаги гап-сўзлар ҳақиқатга зид ва сафсатадан бошқа нарса эмас.
Изоҳ (0)