Samsung компанияси 3 июль куни плазма телевизорларини ишлаб чиқаришни тўхтатганини тасдиқлади. Бунга сабаб плазма телевизорларига бўлган талабнинг пасайиши бўлган. Samsung эндиликда LED технологияси бўйича телевизор ишлаб чиқаришга катта эътибор қаратади. Бу ҳақда Reuters ахборот агентлиги хабар берди, деб ёзади CNN.
Ўтган йили Panasonic компанияси ҳам шундай қарорга келган эди. Жанубий Кореянинг яна бир компанияси — LG ҳам плазма телевизорлар ишлаб чиқаришни тўхтатмоқчи.
Компаниялар эндиликда LED ва LCD экранли телевизорлар ишлаб чиқаришга эътибор қаратади. Чунки пиксельлари газ билан тўлдирилиб, электр токи таъсирида ишлайдиган плазма телевизорларидан кўра ингичка экран ҳамда пиксельлари махсус суюқлик билан тўлдириладиган LED экранли телевизорларга талаб ошиб бормоқда.
Жорий йилнинг биринчи чорагида ўтган йилга нисбатан плазма телевизорларини сотиб олиш ҳажми 16 фоизга камайган. Ҳозирда бир қанча Хитой компаниялари плазма телевизорларини ишлаб чиқараётган бўлса-да, бу 2016 йилгача давом этади.
Изоҳ (0)