АҚШ президенти Барак Обама ўқ қуроли айланмасини чеклаш бўйича Вашингтон ҳеч қандай чора кўра олмаётганидан ҳафсаласи пир бўлганини билдирди. Бу ҳақда Reuters хабар берди.
Президент сўзларига кўра, Америка аҳолиси учун мамлакатда рўй бераётган зўравонликлар одатий ҳолга айланган. Сешанба куни Орегон штатида рўй берган ва ўрта мактаб ўқувчисининг ҳалокатига сабаб бўлган бахтсиз ҳодисага изоҳ берар экан, Обама:«Дунёда бошқа бундай жой йўқ», — деди.
Обама АҚШ конгрессида қурол-яроғ лоббиси устунлик қилаётганини, айни пайтда бу борадаги кичик чекловни ҳам парламент орқали киритиб бўлмасликни афсус билан таъкидлади. «Бунинг учун барчамиз уялишимиз керак», — деди у.
2013 йил бошида Обама конгрессни қурол-яроғга эгалик қилишга чеклов киритишга кўндирмоқчи бўлган, бироқ Миллий ўқчилик ассоциацияси лоббиси томонидан кўрсатилган босим натижасида уриниш пучга чиққан эди.
АҚШ ўқув муассасаларида қуролдан ўқ отиш билан боғлиқ ҳодисалар тез-тез рўй беради. Сўнгги пайтлардаги энг фожиавий воқеа 2012 йилда содир бўлган, ўшанда 20 ёшли йигит «Сэнди Хук» мактабида 26 кишини отиб ташлаган эди.
Изоҳ (0)