UNWTO Ижроия кенгашининг 99-мажлиси Самарқандда ўтказилиши расман тасдиқланди
6 июнь куни Жаҳон сайёҳлик ташкилоти (UNWTO)нинг Ижроия кенгаши ўзининг 99-мажлисини Самарқанд шаҳрида ўтказиш учун овоз берди. Бу ҳақда UzReport хабар берди.
Қарор 2014 йилнинг 4—6 июнь кунлари Испаниядаги Сантяго-де-Компостела шаҳрида ўтказилган UNWTO 98- сессиясида қабул қилинди. Навбатдаги мажлис ўтказиладиган жой Ижроия кенгаши аъзоларининг очиқ овоз бериши орқали аниқланди.
Аввалроқ, UNWTO ижрочи директори Золтан Шомоги Берлиндаги ITB—2014 Халқаро сайёҳлик ярмаркасида 99- сессияни Самарқандда ўтказиш бўйича қарор ҳақида маълум қилган эди. Бироқ расмий эълон Ижроия кенгашининг барча аъзолари розилигини талаб қилган эди.
Эслатиб ўтамиз, 20 йил аввал Буюк Ипак йўли бўйлаб сайёҳликни ривожлантириш халқаро лойиҳасига аъзо-мамлакатларнинг Самарқанд декларацияси қабул қилинган эди. 2004 йилдан бошлаб эса Самарқандда UNWTO қўллаб-қувватлаш офиси фаолият юритиб келмоқда.
