Қозоғистонлик депутатларга ижтимоий тармоқлар орқали «аҳолига яқинлашиш» ўргатилади

Қозоғистондаги «Нур Отан» партиясининг сиёсий менежмент мактаби мамлакат парламентининг қуйи палатаси депутатлари учун ижтимоий тармоқлардан фойдаланиш бўйича курслар ташкил қилди. Бу ҳақда ушбу мактаб раҳбари Ассет Абдуалиевга асосланиб, Tengrinews.kz хабар бермоқда.

Маълум қилишларича, июнь ойи давомида 90 дан ортиқ депутат ижтимоий тармоқлар ва ОАВ билан ишлаш технологиялари бўйича тренинглардан қатнашади. Ташкилотчилар ушбу семинарлардан сўнг янада кўпроқ депутатлар «интернетга чиқади, ўзлари учун янги мулоқот йўлларини топади ва аҳоли билан янада яқинроқ бўлади», деб умид қилмоқда.

«Кун»нинг ёзишича, биринчи семинардан олинган фотосуратларда парламент қуйи палатаси раиси ўринбосари Сергей Дяченко, Мажлиснинг Халқаро ишлар, мудофаа ва хавфсизлик масалалари бўйича қўмита раиси Маулен Ашимбаев ва шу каби бугунгача ижтимоий тармоқларда фаоллиги сезилмаган бошқа депутатларни кўриш мумкин.

Қайд этишларича, ҳозирги вақтда Бахит Сиздиков ва Мурат Абенов каби парламентарийлар ижтимоий тармоқлардан фаол фойдаланиб келади, бироқ улар энди депутат эмас. Амалдаги депутатлар орасида Танирберген Бердонгаров, Мухтар Тиникеев ва Серик Оспанов кабилар интернетда нисбатан фаол.