Ўзбекистонлик курашчи Мўғилистонда Осиё чемпиони бўлди
Мўғилистон пойтахти Улан-Батор шаҳрида эркин, юнон-рум ва аёллар кураши бўйича ўсмирлар ўртасида ўтказилаётган Осиё чемпионатида ўзбекистонлик уч нафар спортчи совриндорлар сафидан ўрин эгаллади. Бу ҳақда Ўзбекистон Миллий Олимпия қўмитаси матбуот хизмати хабар берди.
Юнон-рум кураши бўйича ўтказилган мусобақаларда Ўзбекистон терма жамоаси аъзоси Ислом Баҳромов вазни 50 килограммгача бўлган полвонлар беллашувида барча рақибларини мағлуб этиб, Осиё чемпионатининг олтин медалига сазовор бўлди.
Ушбу вазн тоифасида ҳиндистонлик Анил Анил кумуш медаль совриндори бўлган бўлса, Шимолий Кореялик Нам Квон ҳамда эронлик Реза Хейроллоҳ Нерди бронза медали билан тақдирланди.
Юнон-рум кураши бўйича энг оғир — 120 килограмм вазн тоифасида гиламга тушган ўзбекистонлик Далер Раҳматов эса бронза медали билан тақдирланди. Ушбу вазнда Жанубий Корея вакили Шак Ли Сунг биринчи, хитойлик Бин Лиу иккинчи ўринни эгаллади. Осиё чемпионатининг яна бир бронза медали эронлик Бабак Гасем Размпушга насиб этди.
Шунингдек, қўмита маълумотига кўра, аёллар кураши бўйича бўлиб ўтган мусобақаларда Ўзбекистон шарафини ҳимоя қилган Зуҳра Отамуродова (-44 кг) финалга қадар кечган беллашувларни ғалаба билан якунлаб, кумуш медаль соҳиби бўлди.
Ушбу вазн тоифасида Жин Хянг Пак (KNДР) биринчи ўринни эгаллаган бўлса, Баттогтох Лхагва (Мўғилистон) ва Элвира Абилкаирова (Қозоғистон) учинчи ўринни банд этди.
