«ВКонтакте» ижтимоий тармоғи асосчиси Павел Дуров АҚШда лойиҳа бўйича собиқ шериклари ва Илья Шчербовичнинг UCP фонди бўйича даъво қўзғатди. Дуров уларни ўзининг Telegram мессенжеридаги ҳиссалари бўйича фирибгарлик ва тамагирликда айбламоқда. Бу ҳақда «Ведомости» хабар берди.
Даъвода таъкидланишича, жавобгарлар Дуровдан Digital Fortress, Telegram va Pictograph компанияларини тортиб олиш, сўнг Telegram’да ноқонуний равишда ҳиссага эга бўлиш учун тил бириктирган. Россиялик бизнесмен АҚШ судидан унга етказилган зарарларни қоплаб, уни Telegram’га тегишли барча активларнинг қонуний эгаси деб тан олишни сўрамоқда.
Маълум бўлишича, Дуровнинг ишончли шериклари бўлмиш Илья Перекопский ва Аксель Нефф (Дуров уларга Telegram ишини ишониб топширган эди) UCP шериклари Илья Шчербович, Виктория Лазарева ва Юрий Качуро томонидан сотиб олинган. Дуровнинг савдо белгилари, серверлари ва шартномалари улар қўлига ўтиб қолган.
2 апрелда Шчербович Дуров билан учрашиб, Telegram бизнесининг 48 фоизини уларга берса, Неффдан сотиб олинган компанияларнинг 52 фоизини Дуровга қайтариб беришга ваъда берган. Бироқ Дуров бунга рози бўлмаган.
Качуро даъвода келтирилган маълумотларни «ғирт ёлғон» деб ҳисобламоқда. UCP Telegram’нинг «ВКонтакте»га қайтишини талаб қилмоқда.
Ижтимоий тармоқнинг хўжайинларидан бири — Алишер Усмоновнинг USM Holdings компанияси Дуровнинг гапларини тасдиқлади. UCP унга ҳам Telegram’ни Дуровдан тортиб олишда ҳамкорлик қилишни таклиф этганини айтди.
Изоҳ (0)