2014 йил 14 май куни Ўзбекистон Республикаси Вазирлар Маҳкамаси ҳузуридаги Давлат тест маркази ҳамда Ўзбекистон Республикаси Олий ва ўрта махсус таълим вазирлигининг Ўрта махсус, касб-ҳунар таълими марказининг қарори қабул қилинди. Қарорга асосан, Ўзбекистон Республикаси Вазирлар Маҳкамаси ҳузуридаги Давлат тест маркази ҳамда Олий ва ўрта махсус таълим вазирлигининг Ўрта махсус, касб-ҳунар таълими марказининг 2013 йил 16 июлдаги қарори билан тасдиқланган Ўзбекистон Республикаси ўрта махсус, касб-ҳунар таълими муассасаларида саралаш тест синовларини ўтказиш бўйича йўриқномага ўзгартириш ва қўшимчалар киритилди. Бу ҳақда ҳуқуқшунос Хушнудбек Худайбердиев ўз сайтида хабар берган.
Қарор матнида таъкидланишича, мазкур ўзгартиш ва қўшимчалар Вазирлар Маҳкамасининг 2010 йил 7 июндаги 109-сонли қарори билан тасдиқланган Умумтаълим мактабларининг 9-синф битирувчиларини ўрта махсус, касб-ҳунар таълими муассасаларига қабул қилиш ва расмийлаштиришни ташкил этиш тартиби тўғрисидаги низомга асосан қабул қилинган.Асосий ўзгартиш ва қўшимчалар саралаш тест синовларини ўтказиш тартиб-қоидаларига тааллуқли бўлиб, унга кўра эндиликда ўрта махсус, касб-ҳунар таълими муассасалари учун ўтказилган саралаш тест синови натижалари Давлат тест марказининг расмий веб сайтига жойлаштирилиши белгиланди.
Эслатиб ўтамиз, бир неча йиллардан буён абитуриентларга қулайлик туғдириш мақсадида 1 август куни олий таълим муассасаларида ўтказиладиган тест синови натижалари Давлат тест марказининг расмий веб сайтида эълон қилиб борилади.
Изоҳ (0)