Хакерлар онлайн олди-сотди майдони – eBay маълумотлар базасига бузиб кирди. eBay’нинг расмий хабарида айтилишича, ёмон ниятли кишилар қўлига шифрланган пароллар ва бошқа шахсий маълумотлар тушган бўлиши мумкин.
Яқин орада eBay ўз сайтида, шунингдек, фойдаланувчиларга алоҳида юбориладиган хабарида улардан ўз аккаунтлари паролларини алмаштиришни сўрайди.
Хакерлар ҳужуми февраль охири – март бошларида рўй берган бўлиб, eBay ходимларининг рўйхатга олиш маълумотлари уларнинг қўлига тушгани икки ҳафта аввал, маълумотлар базасига кирилгани эса яқинда маълум бўлди.
Бироқ банк карталари ҳақидаги ва махфий сақланадиган шахсий маълумотлар ушбу базада мавжуд бўлмаган. «Сервис билан ишлашда фойдаланиладиган молиявий маълумотлар шифрланган форматда алоҳида сақланади», - дейилади компания хабарида.
eBay’дагилар ҳужумдан сўнг фойдаланувчилар аккаунтлари орқали ҳеч қандай фирибгарлик фаолияти амалга оширилмаганини таъклидламоқда. Бироқ улар ҳодиса кўламини ошкор қилмаяпти.