Самарқандда «Юксак маънавиятли авлод» фестивалининг вилоят босқичи ўтказилди

Самарқандда «Юксак маънавиятли авлод» ёшлар фестивалининг вилоят босқичи бўлиб ўтди, деб хабар беради ЎзА.

Фестивалда танловнинг туман ва шаҳар босқичларида ғолиб бўлган 350 дан ортиқ иқтидорли йигит-қизлар «Президент асарлари билимдони», «Энг янги тарих билимдони», «Ўз асарида миллийликни акс эттирган рассом», «Ўз асарида миллийликни акс эттирган дизайнер», «Ватан куйчиси», «Энг иқтидорли ҳунарманд», «Бадиий ижод», замонавий илм-фан йўналишидаги «Юксак маънавиятли авлод» номинациялари бўйича билим ва маҳоратларини синовдан ўтказди.

Иштирокчиларнинг ижодий ишлари 14—16, 17—19, 19—25 ёш тоифалари бўйича алоҳида тартибда баҳоланди ва саккиз номинация бўйича 24 нафар ғолиб аниқланиб, улар танловнинг республика босқичида иштирок этиш ҳуқуқини қўлга киритди.

– Ипак матога гул босиш ҳунари билан оилавий шуғулланамиз, – дейди «Энг иқтидорли ҳунарманд» номинацияси ғолиби, Самарқанд санъат коллежи ўқувчиси Комила Ғаниева. – Ҳозирда касб сирларини пухта эгаллаб, уни тенгдошларимга ҳам ўргатяпман. Ушбу ҳаракат ва интилишларим юқори баҳоланиб, танлов ғолиби бўлганимдан хурсандман.

Фестиваль доирасида ҳар бир йўналиш бўйича соҳа мутахассислари, олимлар, шоир ва ёзувчилар томонидан ёшлар учун маҳорат машғулотлари ўтказилди.