Пойтахтда шахмат бўйича биринчи ўзбек гроссмейстери Георгий Агзамов хотирасига бағишланган Tashkent Open VIII халқаро турнирининг тўртинчи тур ўйинлари якунланди. Бу ҳақда ЎзА хабар берди.
Мусобақада мағлубиятсиз ўйнаётган ҳамюртларимиз Антон Филиппов ва Алексей Барсов тўртинчи турдан сўнг 3,5 очкодан жамғариб кучлилар сафида бормоқда. Антон тўртинчи партияда беларуслик Сергей Жигалко билан дуранг ўйнаган бўлса, Алексей Барсов қозоғистонлик Казбек Примовни мағлубиятга учратди.
Ҳозирча россиялик Павел Смирнов ва грузиялик Михаил Мчедлишвили тўрттадан очко жамғарган ҳолда турнирда пешқадамлик қилмоқда. Беларуслик Сергей Жигалко, украиналик Юрий Кузубов, ҳиндистонлик Абҳижит Гупта ва арманистонлик Арман Пашикян 3,5 тадан очкога эга.
– Турнир юқори савияда ташкил этилгани, шунингдек, Ўзбекистон спортчилари ажойиб натижага эришаётгани менда катта таассурот қолдирмоқда, – дейди россиялик шахматчи Сергей Волков. – Биринчи турда беларуслик халқаро гроссмейстер Андрей Жигалко устидан ғалаба қозонган ўн ёшли шахматчи Нодирбек Абдусатторов барчани лол қолдирди. Ўзбекистонда спортни ривожлантириш борасида яратилган шарт-шароитлар бундай ёш истеъдод соҳибларининг муваффақиятларига замин яратмоқда.
Шахматчиларимиздан Нодирбек Абдусатторов, Никита Хорошев, Жўрабек Ҳамроқулов, Акмал Файзуллаев, Улуғбек Тиллаев, Моҳинур Қаҳрамонова, Владимир Егин, Нафиса Мўминова, Баҳодир Холмирзаев ва Вячэслав Аъзамов ҳисобида учтадан очко бор.
– Ўзбекистонлик шахматчиларнинг салоҳияти эътиборга лойиқ, – дейди арманистонлик Роберт Ховханнисян. – Фаолиятини энди бошлаётган шахматчиларнинг муваффақиятлари ўзбек спортининг жаҳон спорт аренасида юқори мавқега эгалигидан далолат бермоқда. Тошкент гўзаллиги ва бетакрор архитектураси билан мени ҳайратга солди. Яшил дарахтларга бурканган бундай шаҳарни кам учратганман.
Изоҳ (0)