17 май куни Тошкент Марказий вокзалидан чиққан «Саломатлик поезди» Сурхондарё ва Қашқадарё вилоятларига қараб йўл олди. Ушбу акция 23 майга қадар давом этади. Бу ҳақда «Туркистон пресс» хабар берди.
«Ўзбекистон темир йўллари» давлат акциядорлик темир йўл компанияси билан биргаликда «Саломатлик поезди» Сурхондарё ва Қашқадарё вилоятлари бўйлаб «Тошкент—Сариосиё—Қумқўрғон—Бойсун—Оқробод—Деҳқонобод—Тошкент» йўналишларида ташкил қилинди.
Навбатдаги «Саломатлик поезди»да юқори малакали шифокорлар гуруҳи аҳолига зарур тиббий ва ижтимоий ёрдам кўрсатиш мақсадида хизмат сафарига отланди. Таъкидлаш жоиз, «Саломатлик поезди» шифокорлари Фонднинг Сурхондарё ва Қашқадарё вилоятларидаги Тиббий-ижтимоий патронаж бригадаси ходимлари билан биргаликда фаолият олиб боради. Ушбу хайрия акцияси давомида аҳолига ва даволаш профилактика муассасаларига қиймати 160,5 минг АҚШ доллари ва 11,9 миллион сўмга тенг инсонпарварлик юклари (турли маҳсулотлар, оёқ кийимлари, дори-дармон ва тиббиёт анжомлари, санитария-гигиена воситалари ва бошқалар)дан иборат мурувват ёрдамлари етказиб берилади.
Бу акция «Соғлом авлод учун» Фонди томонидан АҚШнинг AmeriCares ва Resourse & Police Exchange халқаро ташкилотлари, Болгариянинг Sofarma компанияси, Nestle Uzbekistan қўшма корхонаси, «Ўқитувчи» нашриёт-матбаа ижодий уйи, «Бахтекс» МЧЖ, «Шаффоф сервис» қўшма корхонаси ва бошқалар кўмагида амалга оширилмоқда.
«Саломатлик поезди» иш режаси давомида Сариосиё, Қумқўрғон, Бойсун, Оқробод, Деҳқонобод станцияларига яқин ҳудудлардан ташқари «Соғлом авлод учун» фонди Сурхондарё ва Қашқадарё вилоят ҳудудий филиалларининг автоамбуланс машинаси орқали ҳудуддаги барча «Мурувват», «Меҳрибонлик» ва «Саховат» уйлари, шу билан бир қаторда марказий шифохоналар, вилоят болалар туғруқ комплексларига ҳамда имконияти чекланган болалар махсус мактаб интернатларига ҳам меҳр-мурувват ёрдами кўрсатиш режалаштирилган.
Режага асосан, 2014 йил 17 май куни йўлга чиққан «Саломатлик поезди» 18 майдан ўз ишини бошлади. Бир ҳафта давомида малакали мутахассислар томонидан ҳудудлардаги ногирон болалар, хотин-қизлар, боқувчисини йўқотган ва кўп болали оилалар аъзолари тиббий кўрикдан ўтказилади. Шунингдек, акция доирасида жойлардаги махсус муассасалар, ёрдамчи мактаб ва мактабгача таълим муассасаларига мурувват ёрдамларини топшириш билан бир вақтда малакали шифокорлар иштирокида аҳоли орасида соғлом турмуш тарзи тарғиботига бағишланган учрашувлар ташкил этиш кўзда тутилган.
Изоҳ (0)