Тошкентда Жаҳон иқтисодиёти ва дипломатия университети қошидаги НАТО депозитар кутубхонасининг очилиши бўлиб ўтди. Альянснинг ушбу ташаббуси НАТО Жамоатчилик дипломатияси бошқармаси ва ЖИДУ ўртасида 2013 йил декабрида тузилган битимга мувофиқ амалга оширилди. Бу ҳақда «Жаҳон» хабар берди.
Маросимда НАТО бош котибининг Марказий Осиё ва Кавказ бўйича махсус вакили Жеймс Аппатурай сўзга чиқиб, халқаро муносабатлар каби бундай муҳим соҳада талабалар ва мутахассислар билан ҳамкорлик йўли орқали келажакдаги ўзаро муносабатларга пойдевор қўйилганини қайд этди.
Нашрнинг ёзишича, кутубхона яратишдан асосий мақсад НАТО ва шу соҳадаги мавзуларга боғлиқ маълумотларни талабалар, ОАВ, Ўзбекистон ҳукумати вакиллари, дипломатик корпус ва халқаро ташкилотлар вакилларига тақдим этишдан иборат.
Кутубхонада шунингдек, турли тадбирлар ҳам ўтказилади. Унинг йиллик бюджети 15 минг евро бўлиб, альянс томонидан таъминланади.
16 май куни Тошкентда Марказий Осиё мамлакатлари билан алоқа ва ўзаро ҳамкорлик бўйича НАТО ходими бюроси расман очилди.
Марказий Осиё мамлакатлари билан алоқа ва ўзаро ҳамкорлик бўйича НАТО ходими кичик штат билан бирга НАТОнинг жойлардаги дипломатик вакили вазифасини бажаради. Бундан ташқари, мудофаа режаси ва таҳлили, НАТО операцияларига ёрдам бериш, ҳарбий таълим ва тайёргарлик, илмий ва экологик масалалар бўйича ҳамкорлик, жамоатчилик дипломатияси каби соҳаларда НАТОнинг Марказий Осиёдаги шериклар билан амалий ҳамкорлигига кўмак беради.
Изоҳ (0)