Туркия кўмир конидаги портлашда ҳалок бўлганлар сони 284 тага етди

Туркиянинг Маниса провинциясидаги кўмир конида содир бўлган ҳалокатдан уч сутка ўтиб, қурбонлар сони 284 тага етди. Ўтган кеча қутқарувчилар яна бир мурдани ер юзасига чиқаришди. Бу ҳақда «ИТАР-ТАСС» хабар берди.

Туркия энергетика ва табиий манбалар вазири Танер Юлдузнинг айтишича, ёнғин майдони камайиб, ис гази бироз тарқалган. Айни пайтда ер ости ҳудудини совитиш ишлари олиб борилмоқда.

Конда яна 18 ишчи қолган. «Шунча оила ўз қариндошларининг йўқолганини хабар қилган. Қутқарув операцияси давом этмоқда», — деди вазир.

Сома кон шаҳри шифохонасида кончиларнинг оила аъзолари навбатчилик қилмоқда. Туркияда ушбу бахтсиз ҳодиса билан боғлиқ умуммиллий мотам давом этмоқда.