Сунъий йўлдошдан олинган суратлар Шимолий Кореяда иккита энг янги ҳарбий кемалар пайдо бўлганини кўрсатди. Улар бу мамлакатда сўнгги 25 йилда қурилган энг йирик кемалар бўлди. Бу ҳақда «РИА Новости» хабар берди.
Шимолий Кореянинг ушбу икки фрегати фотосуратлари 2013 йил декабридан 2014 йил январигача бўлган даврда олинган. Унда кемалардан бири Нампхо портида, бошқаси Нажин портидаги верфда тўхтаб турганини кўриш мумкин. Шу билан бирга, Шимолий Корея сув усти флоти Тинч океани минтақасида энг кучсизларидан бири сифатида баҳоланади.
38 North интернет-портали мутахассисларининг таъкидлашича, КХДРнинг янги ҳарбий кемалари вертолёт майдончалари ва ракета мажмуалари билан жиҳозланган.
Шимолий Корея қуролланиши бўйича АҚШлик мутахассис Жозеф Бермудес ушбу ҳарбий кемаларнинг пайдо бўлиши КХДРни кучли ҳарбий-денгиз мамлакатига айлантирмаслигини айтди. «Жиддий низо юзага келган тақдирда АҚШ ва Жанубий Кореянинг бирлашган ҳарбий денгиз ва ҳарбий ҳаво кучлари ҳеч қийинчиликсиз уларнинг кемаларини чўктириб юборади», — деди у.
Изоҳ (0)