2014 йилнинг 15—23 май кунлари Тошкентда Ўзбекистоннинг биринчи гроссмейстери Георгий Агзамов хотирасига бағишланган 8th Agzamov Memorial, Tashkent Open халқаро турнири ўтказилади. Бу ҳақда Ўзбекистон Миллий Олимпия қўмитаси матбуот хизмати хабар берди.
Швейсарча тизимда тўққиз турдан иборат бўлган бу йилги мусобақада 13 давлатдан 106 нафар шахмат устаси ғолиблик учун дона суради.
Халқаро хотира турнири иштирокчилари орасидан 14 нафар халқаро гроссмейстер, уч нафар аёл халқаро гроссмейстер, тўрт нафар халқаро мастер ўрин эгаллаган.
Маълумот учун. Георгий Тажихонович Агзамов 1954 йилнинг 6 сентябрь куни Тошкент вилоятининг Олмалиқ шаҳрида таваллуд топган. Агзамовлар оиласида вояга етган уч ўғилнинг (Вячэслав, Валерий, Георгий) барчаси шахматга болалигидан меҳр қўйган. Уч ўғил орасида энг иқтидорлиси ҳисобланган Георгий 11 ёшида Олмалиқ шаҳар чемпионатида (катталар орасида) ғолибликка эришади.
19 ёшга келиб мастер даражасига етган Георгий, 1982 йили Белградда, 1983 йили Вршацеда ва 1984 йили Сочи шаҳрида ўтказилган мусобақаларда ғолибликка эришиб, гроссмейстер талабини бажарган. 1984 йили Грециянинг Салоники шаҳрида ўтказилган ФИДЕ конгрессида Георгий Агзамовга Гроссмейстер унвони берилган.
Г. Агзамов 1981—1983 йиллар давомида олтита йирик халқаро турнирда зафар қучган. Георгий Агзамов 1986 йилнинг 27 август куни кечки пайт Севастополь кўчаларини сайр қилиб юрганда тўсатдан жарликка тушиб кетади ва 31 ёшида ҳаётдан кўз юмади.
Ака-ука Вячэслав ва Валерий Агзамовлар эса ҳамон шахмат бўйича ўтказиладиган мусобақаларда иштирок этиб келади. Яқинда фахрийлар ўртасида ўтказилган Ўзбекистон чемпионатида Валерий биринчи, Вячэслав эса иккинчи ўринни эгаллади.