АҚШ Европадаги ҳамкорлари билан Россияга қарши янги санкциялар раунди бўйича келишувга эришди. Улар 25 май куни Украинада бўладиган президентлик сайловларини Москва бузишга ҳаракат қилган тақдирда иқтисодиётнинг бутун соҳаларига жорий қилинади. Бу ҳақда Reuters хабар берди.
АҚШ давлат котиби Жон Керри пайшанба куни Лондонда Евроиттифоқнинг асосий давлатлари ташқи ишлар вазирлари билан учрашди ва Россиянинг кон-руда саноати ва газ соҳаси каби йирик иқтисодий секторларига санкция киритиш бўйича Вашингтон фикри билан бўлишди.
Улар Украинанинг барча ҳудудларида, жумладан шарқий ҳудудларида ҳам эркин ва адолатли президентлик сайловлари ўтказилиши керак, деган хулосага келишган.
Ўша куннинг ўзидаёқ Москва Украина президентлик сайлови ўтказадиган ҳафтада унинг чегарасидан 200 км масофада жойлашган ҳарбий полигонда «Авиадартс — 2014» ҳарбий машғулотларини ўтказишини эълон қилди.
Украина ташқи ишлар вазирлиги Россиянинг ушбу ҳаракатини «Украина билан чегара ва умуман бутун ҳудудда тангликни кучайтириш учун қилинаётган очиқдан-очиқ провокация» деб атади.
Ўтган ҳафтада Россия президенти Украина билан чегарадан Москва ўз ҳарбийларини олиб кетгани ҳақида баёнот берди, АҚШ ва НАТО сунъий йўлдошдан олинган суратларга асосланиб, бунинг тескарисини таъкидламоқда.
Изоҳ (0)