Ўзбекистон Давлат Божхона қўмитаси контрабандага қарши кураш бўлими ходимларининг бошқа ҳуқуқни ҳимоя қилиш органлари билан ҳамкорликдаги тезкор ҳаракатлари натижасида мамлакатдан катта миқдордаги рангли металл олиб чиқиб кетилишининг олди олинди. Бу ҳақда божхона қўмитаси матбуот хизмати хабар берди.
Бухоро вилояти Вобкент туманида яшовчи Н. Қурбоновнинг уйи белгиланган тартибда тинтув қилиниш чоғида қўшни республикага олиб кетилишга мўлжалланган ва ноқонуний сақланаётган, умумий қиймати 6 миллион сўмга тенг 2380 килограмм рангли металл топилди.
Бундан ташқари, Ғиждувон туманидаги Ж. Тўхтаевга тегишли уй тезкор маълумотлар асосида текширилди. Натижада 4,8 миллион сўмлик 3 тонна рангли металлнинг ноқонуний сақланаётгани аниқланди.
Юқоридаги фактлар бўйича тергов ишлари олиб борилмоқда.
Божхона статистика маълумотларига кўра, 2014 йилнинг ўтган даври мобайнида божхона ходимлари томонидан рангли металл билан боғлиқ 20 та қонунбузарлик ҳолатлари аниқланган, натижада 33,8 миллион сўмга тенг 21 тоннадан зиёд металл мусодара этилган.
Изоҳ (0)