Тошкентдаги «Туркистон» саройида Соғлом бола йилига бағишлаб «‘Фарҳод’ жавоҳирлари» концерт дастури бўлиб ўтди. Навоий кон-металлургия комбинати томонидан ташкил этилган ушбу тадбирдан комбинатга қарашли «Фарҳод» маданият саройининг энг яхши ижодий жамоалари, рақс дасталари ва ансамблларининг чиқишлари ўрин олди. Бу ҳақда ЎзА хабар берди.
Навоий кон-металлургия комбинати ҳузурида саккизта маданият саройи ва клуб фаолият юритиб, уларда беш мингдан зиёд киши шуғулланмоқда. Турли ёшдаги 1600 нафардан зиёд кишини бирлаштирган «Фарҳод» маданият саройи шундай муассасалардан биридир.
25 ижодий жамоаси халқ ва намунали жамоа унвонларига эгалиги, икки нафар ижрочи «Ниҳол», яна бири Зулфия номидаги Давлат мукофотига сазовор бўлгани маданият саройининг нечоғли самарали фаолият кўрсатаётганидан далолат беради.
«Фарҳод» маданият саройининг «Ширин», «Марварид», «Бахтли болалик», «Соната» каби хореография ансамбллари мамлакат миқёсидаги байрамлар ва бошқа маданий тадбирларнинг театрлаштирилган томошаларида мунтазам иштирок этиб келмоқда.
«‘Фарҳод’ жавоҳирлари» концертига пойтахтдаги меҳрибонлик уйлари тарбияланувчилари, уруш ва меҳнат фахрийлари, талабалар ҳамда ихтисослашган маданият ва санъат таълим муассасалари ўқувчилари, кам таъминланган оилалар фарзандлари таклиф этилди.
– «Туркистон» саройида икки йилдан буён ўз санъатимизни намойиш этиб келмоқдамиз. Намойишлар чоғида томошабинлар чеҳрасида хурсандчиликни кўриш биз учун энг катта мукофотдир, – дейди «Бахтли болалик» халқ хореография ансамбли иштирокчиси З. Солиева. – Кўп йиллардан буён «Фарҳод» маданият саройида шуғулланиб келаман ва бу ер менинг иккинчи уйимга айланган.
Шунингдек, «Туркистон» саройи фойесида «Фарҳод» маданият саройи ҳузуридаги Болалар ижодиёт маркази тарбияланувчиларининг кўргазмаси ҳам ташкил этилди. Унда болалар томонидан тайёрланган ҳақиқий санъат асарлари – сопол буюмлар, бисерлар, тикилган ва тўқилган буюмлар, бошқариладиган авиа ва кема моделлари намойиш этилди.
Изоҳ (0)