Бадиий гимнастика билан мунтазам шуғулланиб келаётган Сирдарё вилояти Боёвут туманидаги 2-умумтаълим мактабининг 5-синф ўқувчиси Шаҳло Назарованинг бугун қувончи чексиз. Унга минглаб тенгдошлари қатори миллий анъаналари асосида тайёрланган спорт кийимлари совға қилинди, деб хабар бермоқда ЎзА.
Ўзбекисон Болалар спортини ривожлантириш жамғармаси ҳомийлигида спорт билан мунтазам шуғулланаётган 3 минг нафар қизга миллий анъаналар асосида тайёрланган спорт либослари совға қилинди.
Сирдарё вилояти ҳокимлиги, хотин-қизлар қўмитаси, Болалар спортини ривожлантириш жамғармаси вилоят филиали ҳамкорлигида туман ва шаҳарларда ўтказилган спорт кийимларини топшириш маросимлари байрамона куй-қўшиқларга, спорт мусобақаларига уланиб кетди. Тадбирларда спортчи қизлар бадиий гимнастика, дзюдо, теннис, кураш, енгил атлетика бўйича ўз маҳоратларини намойиш этди.
– Давлатимиз раҳбари ташаббуси билан болалар спортини ривожлантиришга қаратилаётган алоҳида эътибор, хусусан, қизларга миллий анъаналаримизга хос спорт кийимлари совға қилинаётгани ота-оналарнинг қизлар спортига муносабатини тубдан ўзгартирмоқда, – дейди Болалар спортини ривожлантириш жамғармаси Сирдарё вилояти филиали директори Улуғбек Йўлдошев. – Йил охирига қадар яна 3 минг нафарга яқин спортчи қизларга шундай кийимлар совға қилиниши режалаштирилган.
Сирдарё вилоятида 2003—2013 йилларда 79 болалар спорти иншооти ва мусиқа мактаблари фойдаланишга топширилди. Айни пайтда ушбу спорт мажмуаларида 29 мингга яқин бола спортнинг 43 тури билан мунтазам шуғулланмоқда.
2013 йилда 9 минг нафарга яқин қиз спорт билан мунтазам шуғулланган бўлса, бугунги кунда спортнинг 36 тури бўйича 779 сексияда 10 минг 200 дан зиёд қиз малакали мураббиялар раҳбарлигида машғулотларда қатнашмоқда.
Изоҳ (0)