Тошкент ахборот технологиялари университети Самарқанд филиалида бўш иш ўринлари ярмаркаси ўтказилди, деб хабар бермоқда ЎзА.
Самарқанд шаҳар ҳокимлиги, бандликка кўмаклашиш ва аҳолини ижтимоий муҳофаза қилиш маркази ҳамда «Камолот» ёшлар ижтимоий ҳаракати шаҳар кенгаши ҳамкорлигида ташкил этилган тадбирда 80 га яқин корхона ва ташкилот 800 дан ортиқ бўш ва квота иш ўринлари билан қатнашди.
– Ўтган йили Алишер Навоий номидаги Самарқанд давлат университетини психолог мутахассислиги бўйича битирганман, – дейди Дилноза Назарова. – Бугунги меҳнат ярмаркасида таклиф этилган иш ўринлари билан танишиб, шаҳардаги 115-мактабгача таълим муассасасига педагог-психолог сифатида ишга йўлланма олдим.
Ярмаркада 40 нафарга яқин фуқаро ишга жойлашиш имкониятига эга бўлди.
ЎзА маълумотига кўра, Андижон вилояти Асака тумани маданият ва истироҳат боғида туман ҳокимлиги, прокуратураси, ички ишлар бўлими ҳамда бандликка кўмаклашиш ва аҳолини ижтимоий муҳофаза қилиш маркази ҳамкорлигида ҳам бўш иш ўринлари ярмаркаси ўтказилди.
Ярмаркада тумандаги 106 корхона, ташкилот, муассаса ва фермер хўжаликлари 310 бўш иш ўрни билан иштирок этди.
– Жорий йилнинг дастлабки чорагида туманда 1 минг 953 янги иш ўрни яратилди, – дейди туман бандликка кўмаклашиш ва аҳолини ижтимоий муҳофаза қилиш маркази раҳбари Санжарбек Алиохунов. – Навбатдаги меҳнат ярмаркасида асосан уйда ўтирган хотин-қизлар ва касб-ҳунар коллежи битирувчиларига ишга жойлашиш учун йўлланма берилди.
– Мен Асака автомобилсозлик касб-ҳунар коллежини битирганман, – дейди Сабриддин Шамшиддинов. – Ярмаркада ўз мутахассислигим бўйича «Ўз Донг Вонг Ко» Ўзбекистон-Корея қўшма корхонасига йўлланма олдим.
Изоҳ (0)