Истомин Мюнхендаги турнирнинг собиқ ғолибини мағлуб этди
Германиянинг Мюнхен шаҳрида теннис бўйича анъанавий тарзда ўтказилиб келинадиган BMW Open by FWU AG халқаро турнири биринчи даврасида Денис Истомин германиялик Филипп Колшрайберга қарши кортга чиқди. Бу ҳақда «Туркистон пресс» хабар берди.
Денис Истомин ўзининг тезкор ўйини билан дастлабки сетни ўз фойдасига 7:5 ҳисобида ҳал этди. Иккинчи сетга келиб, Филипп ўйин тизгинини ўз қўлига олди ва 6:2 ҳисобида Денисни мағлубиятга учратди. Ҳал қилувчи учинчи сетда Истомин маҳорати юқори даражада эканлигини исботлаб, учрашувни ўз фойдасига ҳал қилди —ҳисоб 6:4. Натижада Ўзбекистон вакили иккинчи даврага йўл олди.
Маълумот ўрнида: Филипп Колшрайбер 2012 йил мазкур турнирда бош совринга эга бўлган бўлса, 2013 йилда финалга қадар етиб келган.
Эслатиб ўтамиз, BMW Open by FWU AG халқаро турнирининг мукофот жамғармаси 426 605 еврони ташкил этади.
