Остонадаги мактаблардан бирида биринчи синф ўқувчиси ўта кучли даражадаги куйиш олди. Энди унга тери кўчириб ўтказилади. Жароҳатга Samsung Galaxy смартфони сабаб бўлди. У қизчанинг чўнтагида портлаб кетди. Бу ҳақда «ИТАР-ТАСС» хабар берди.
Ишлаб чиқарувчининг маҳаллий бўлинмаси ҳодиса бўйича текширув олиб бормоқда.
Маълум бўлишича, қизалоқ ўз ҳовлисида тенгдошлари билан ўйнаётган вақтида тўсатдан қасир-қусур овоз эшитилган ва у чинқириб юборган. Қизнинг эгнидаги шим ёниб кетган. Отасининг айтишича, кийимга қўшилиб, қизининг териси ҳам ёнган, куйиш суяккача етиб борган. Айни пайтда у онаси билан шифохонада тери кўчириб ўтказиш операциясини кутиб ётибди.
Қизнинг отаси бахтсиз воқеа сабабини ипидан-игнасигача аниқлаштиришга бел боғлаган. Samsung компаниясининг Қозоғистондаги ваколатхонаси ҳам жабрланган қизнинг ота-онаси билан боғланиб, ёрдам беришга тайёрлигини билдирган ва ҳодиса сабабини таҳлил қилишга ваъда берган.
Компания вакиллари истеъмолчиларни мобил қурилмалардан фойдаланиш хавфсизлиги ҳақида огоҳлантиришга шошилди. Бундай ҳолатларга кўпинча сертификатланмаган эҳтиёт қисмлари, хусусан аккумулятор батареясини қўллаш сабаб бўлишини таъкидлади.
Изоҳ (0)