Россия Ташқи ишлар вазири Сергей Лавров Украина атрофидаги вазиятга изоҳ берар экан, Россия ва унинг фуқароларига қарши ҳужум уюштирилган тақдирда Россиянинг ҳам айнан шундай жавоб беришини маълум қилди. «Агар бизнинг қонуний манфаатларимизга, россияликларнинг манфаатларига Жанубий Осетияда бўлгани каби тўғридан-тўғри ҳужум қилинадиган бўлса, мен халқаро ҳуқуқ нормаларига мувофиқ ҳолда ҳарбий йўл билан муносиб жавоб беришдан ўзга чорани кўрмаяпман», — деб жавоб берган вазир 23 апрель куни Russia Today телеканалига берган интервьюсида.
Украина Ташқи ишлар вазирлигида Лавровнинг бу сўзлари Россиянинг Украинага қарши зуғум ўтказишга тайёрланаётганлиги сифатида қабул қилинди. Вазиятга Киевнинг баҳо беришича, Россия ва россияликларга ҳужум уюштирилиши эҳтимоли Украина можароларга барҳам бериш ва уларни тинч йўл билан ҳал қилиш учун интилаётган бир пайтда мутлақо асоссиздир.
Ғарбнинг Россия—Украина чегараси яқинида жойлашган рус қўшинлари борасидаги айбловларига Лавров қуйидагича жавоб берди: «Қўшинларимиз ўз ҳудудимизда жойлашган. Улар Сергей Шойгу Мудофаа вазири лавозимига тайинлангандан бери мунтазам амалга оширилаётган ҳарбий машғулотларда иштирок этган». Шунингдек, у ўтган йили машғулотлар Россиянинг шарқий қисмида, Сибир, мамлакатнинг марказий ҳудудлари — Украина яқинида ташкил этилганини эслатиб ўтган.
Изоҳ (0)