АҚШ Ҳарбий денгиз кучлари қўмондонлиги ўзининг Қора денгиздаги кемалари сонини кўпайтирмоқда. Бу ҳақда 23 апрель куни Россия Ҳарбий денгиз флоти бош штаби «Интерфакс» агентлигига маълум қилган. 22 апрель куни Американинг «Тейлор» фрегати (USS Taylor) бўғозларни кесиб ўтиб, Қора денгизга етиб келган.
Аввалроқ, АҚШ ҲДК ахборот хизмати томонидан маълум қилинганидек,«Тейлор»нинг мақсади Вашингтоннинг НАТО доирасидаги иттифоқчиларига ушбу минтақада альянс кучлари билан ўзаро ҳамкорликни ривожлантириш борасидаги интилишларини тасдиқлашдир.
«Интерфакс» вакилининг хабар беришича, «Тейлор» Сочидаги Олимпия ўйинлари даврида Американинг 6-флотига қарашли «Маунт Уитни» кемаси ҳамроҳлигида Қора денгиз томон йўл олган. 12 февраль куни Туркиянинг Самсун портига кириб бориш пайтида фрегат винтига шикаст етган. Қора денгиздан «Тейлор»ни ёрдамчи кема тортиб олиб кетган ва у Грециянинг Суда портида қайта таъмирланган.
АҚШ Украинада 2013 йилнинг ноябрь ойидан бери давом этаётган сиёсий таназзул муносабати билан Қора денгизга ўз ҳарбий кемаларини юборишни давом эттирмоқда. Денгизнинг шимолий қисмида жойлашган Қрим яримороли эса Украина таркибидан чиқиб, Россия Федерациясининг тенг ҳуқуқли объектига айланди. Aпрел ойи бошларида Украина шарқида федераллашув тарафдорларининг намойишлари бошланди. НАТОга аъзо мамлакатлар бунда Россиянинг қўли бор, деб ҳисоблашмоқда.
Аввалроқ, Американинг «Дональд Кук» ҳарбий кемаси Қора денгизга йўналтирилган эди. Ҳозирда у Руминия соҳиллари яқинидаги машғулотларда иштирок этмоқда.
Изоҳ (0)