Туркия бош вазири Ражаб Таййиб Эрдўғон мамлакат парламентида нутқ сўзлаб, ХХ аср бошларида арман миллатига қарши амалга оширилган оммавий қирғин натижасида ҳалок бўлганларнинг авлодларига илк бор ҳамдардлик билдирди. Бу ҳақда Gazeta.ru нашри хабар берди.
Таъкидлаш жоиз, Эрдўғоннинг мазкур нутқи тўққиз тил, жумладан, шарқий ва ғарбий Арманистон халқлари тилларида ҳам чоп этилган.
«Умид қиламанки, умумий мураккаб ва бетакрор географик минтақада урф-одат ва анъаналари муштарак бўлган қадимий халқлар ўз ўтмишлари ва йўқотишларига биргаликда муносиб тарзда баҳо беришга қодир. ХХ аср бошларидаги аянчли воқеалар қурбонига айланган арман миллатига оид инсонларнинг руҳи шод бўлсин. Уларнинг авлодларига эса чуқур таъзия ижор этаман», — деди сиёсатчи.
У ўз нутқи давомида Усмонлилар империяси ҳукмронлик қилган сўнгги йиллар диний ва этник келиб чиқишидан қатъий назар, турк, курд, араб, арман ва бошқа миллионлаб фуқаролар ҳаётида «ачинарли воқеаларга бой оғир давр» бўлганини эътироф этган.
Эслатиб ўтамиз, Туркия ва Арманистон ўртасидаги дипломатик муносабатлар тўхтатилган, давлатлар ўртасидаги чегара эса 1993 йилда ёпиб қўйилган эди. Бундай холатга аввало Туркиянинг Қорабоғ муаммоси бўйича Озарбайжон позициясини қўллаб-қувватлаганлиги ҳамда 1915 йилда Усмонлилар Империяси томонидан арманларга қарши уюштирилган геноциднинг халқаро миқёсда тан олинишига Анқаранинг билдирган муносабати сабаб бўлган эди.
Изоҳ (0)