Сурхондарё вилоятида 40 дан ортиқ никоҳ тўйи муайян муддатга тўхтатилди, деб хабар берди ЎзА.
«Маҳалла» хайрия жамоат фонди вилоят бўлими берган маълумотларга кўра, эрта турмушнинг олдини олиш бўйича кўрилаётган чора-тадбирлар натижасида Ангор туманида икки, Узун туманида уч, Қумқўрғонда етти, Музработда саккиз, Термиз шаҳрида битта никоҳ тўйини муайян муддатга тўхтатиб қўйишга тўғри келди.
– Қизларни эрта турмушга узатишнинг олдини олишда маҳалла жамоатчилиги яқиндан кўмаклашмоқда, – дейди Қумқўрғон туманидаги «Пахтаобод» маҳалла фуқаролар йиғинининг диний маърифат ва маънавий-ахлоқий тарбия масалалари бўйича маслаҳатчиси Ойдавлат Раҳимова. – Жумладан, жорий йилнинг ўтган даврида Қумқўрғон енгил саноат касб-ҳунар коллежида таҳсил олаётган икки қизнинг никоҳ тўйи вақтинча тўхтатилди. Бунинг учун маҳалла жамоатчилиги вакиллари иштирокида қизларнинг ота-оналари билан суҳбат ўтказилиб, эрта турмушнинг салбий оқибатлари уларга тушунтирилди.
Вилоятда ўтган йилларда йўл қўйилган камчиликлар атрофлича таҳлил қилиниб, вояга етмаган ўқувчи қизларни турли тўгаракларга жалб этишга алоҳида эътибор қаратилмоқда. Маҳалла фуқаролар йиғинлари қошидаги «Ота-оналар университети» ва «Маслаҳат марказлари» фаолияти такомиллаштирилиб, ота-оналарнинг ҳуқуқий, маънавий-ахлоқий, физиологик билимларини ошириш бўйича тадбирлар ташкил этилмоқда.
Умумтаълим мактаблари ва коллежларда «Соғлом оила – юрт таянчи», «Тиббий кўрикнинг аҳамияти», «Эрта турмушга чиқишнинг оқибатлари», «Сиз турмуш қуришга тайёрмисиз?», «Эрта ҳомиладорликнинг оқибатлари» каби мавзуларда учрашув, семинар ва давра суҳбатлари мунтазам ташкил этилмоқда. Маҳаллаларда «Фарзандлар тарбиясида ота-онанинг вазифалари», «Оилада отанинг ўрни» каби мавзуларда ўтказилаётган маърифий тадбирлар ҳар томонлама баркамол авлодни вояга етказиш, уларнинг замонавий билим ва касб-ҳунар эгаллашига кўмаклашишда муҳим аҳамият касб этмоқда.
Изоҳ (0)