Дуров Россияни бутунлай тарк этди ва қайтмоқчи эмас
«ВКонтакте» ижтимоий тармоғи асосчиси Павел Дуров Россияни бутунлай тарк этди. Бу ҳақда у TechCrunch блогига берган интервьюсида маълум қилган. «Мен Россияда эмасман ва ортга қайтишни умуман режалаштирмаяпман. Афсуски, ҳозирги пайтда мамлакат интернет бизнесни юритишга умуман мўлжалланмаган», — деди у. Дуров ўзининг келгусидаги фаолиятига ойдинлик киритиб, мобил телефонлар учун ижтимоий тармоқ яратишини айтган.
«ВКонтакте» масъулияти чекланган жамияти 21 апрелда Дуровнинг ўз аризасига кўра ишдан кетганини эълон қилган эди. Дуровнинг айтишича, у ишдан кетиш ҳақидаги ўз аризасини қайтариб олган, бироқ бу «қоидаларга зид» деб топилган.
Кейинчалик «ВКонтакте» тармоғининг 48% акцияларига эгалик қиладиган UCP фонди сармоядорлардан бемаслаҳат амалга оширилгани учун Дуровнинг ишдан бўшатилиши тўғрисидаги буйруқ асоссиз эканини билдирган. Бунга жавобан тармоқнинг ижрочи директори Дмитрий Сергеев Дуровнинг ишдан кетиши масаласи юридик нуқтаи назардан тамомила ҳал қилингани ва акциядорлардан бирининг розилигини олиш ҳеч қандай аҳамият касб этмаслигини айтган.
