22-апрел куни Алоқа тарихи музейида Ўзбекистон Республикаси Алоқа, ахборотлаштириш ва телекоммуникация технологиялари давлат қўмитаси ҳамда Жанубий Кореянинг Инҳа университети маъмурияти ҳамкорлигида Тошкент шаҳрида Инҳа университети фаолиятини ташкил этишга бағишланган матбуот анжумани бўлиб ўтди.
Матбуот анжуманида таъкидланишича, янги таълим даргоҳи жорий йилда техниканинг энг сўнгги қулайликлари билан жиҳозланган ўқув мажмуида, Тошкент шаҳри, Зиёлилар кўчаси, 9, 13 «а» биноларида фаолиятини бошлайди.
Айни пайтда Ўзбекистон Республикаси Фанлар Академиясининг тарих институти ҳамда «Фан» нашриётининг собиқ биноларида кенг кўламли капитал таъмирлаш ва реконструкция ишлари олиб борилмоқда. Университетнинг янги ўқув мажмуида ўқув бинолари билан бир қаторда, талабалар ҳамда хорижлик мутахассислар учун турар-жой биноларини қуриш ҳам кўзда тутилган.
Инҳа вакилининг таъкидлашича, янги университетга қабул қилиш 7 майдан бошлаб амалга оширилади. Абитуриентлар жорий йилнинг 7 май кунидан 21 июнгача Тошкент шаҳридаги Инҳа университетнинг расмий сайтида онлайн рўйхатдан ўтишлари керак бўлади. Онлайн рўйхатдан ўтгандан сўнг абитуриентлар 2014 йил 6 июндан 20 июнгача, ҳар куни соат 18:00 га қадар университет қабул комиссиясига зарур ҳужжатларни тақдим этиши лозим.
Қабул комиссиясига топшириш зарур бўлган ҳужжатлар:
- Ариза;
- IELTS тизими гувоҳномаси;
- Ўрта, ўрта-махсус ёки олий таълимни тугатганлиги тўғрисидаги ҳужжат, ОТМни тугатганлиги тўғрисидаги гувоҳноманинг асл нусхаси (ОТМни жорий йилда тугатадиганлардан ташқари);
- 3×4 ҳажмдаги 6 дона фотосурат;
- №086 шаклидаги тиббий маълумот;
- Ҳарбий гувоҳнома нусхаси;
- Фуқаролик паспорти нусхаси ёки Ўзбекистон резидентлиги тўғрисида маълумот.
Тошкент шаҳрида Инҳа университетини ташкил этиш бўйича муассасалараро комиссиянинг қарорига мувофиқ, ўрта умумтаълим мактаби (11 йиллик), академик лицей ва касб-ҳунар коллеж (12 йиллик)ларини тамомлаганлар синов имтиҳонлари натижаларига кўра, тўлов-шартнома асосида ўқишга қабул қилинади.
Университетда ўқиш нархи йилига қарийб 5000 АҚШ долларини ташкил этади. Тўлов Марказий банк курси бўйича сўмда амалга оширилади. Таққослаш учун: Жанубий Кореядаги Инҳа университетида ўқиш нархи йилига 10 минг долларни ташкил этади.
Шунингдек, энг камида 10 та грант ўрни ташкил этиш ҳам кўзланмоқда. Бу ўринлар кириш имтиҳонларида фақат энг юқори балларни тўплаганлар учун мўлжалланади.
Тошкент шаҳридаги Инҳа университетининг 2014—2015-ўқув йилида илк дарслари жорий йилнинг 1 октябрь кунидан бошлаб ташкил этилади. Унда таълимнинг учта — компьютер инжиниринг, дастурий инжиниринг ва компьютер тармоқлари инжиниринги йўналишлари бўйича 150 нафар бакалавр қабул қилинади.
Университетда дарслар инглиз тилида олиб борилишини инобатга олган ҳолда, абитуриентлардан IELTS (Халқаро инглиз тили тест тизими)да инглиз тилини 5,0 балл даражасида билиш талаб этилади.
Таълим муассасасида ўқув таълимнинг кундузги шаклида Инҳа университети (Корея Республикаси) ўқув режалари ва дастурларига мувофиқ, Ўзбекистон Республикаси давлат таълим стандартлари талабларини ҳисобга олган ҳолда амалга оширилади. Ўқиш давомийлиги 4 йилни ташкил этади.
Тошкент шаҳридаги Инҳа университети қабул комиссияси Тошкент шаҳри, Олмазор тумани, Умид кўчаси 1-«а» уйда жойлашган Турин политехника университети қошидаги академик лицейда фаолият кўрсатади.
Шунингдек, матбуот анжуманида Университет битирувчиларига Инҳа университети (Корея Республикаси)нинг белгиланган намунадаги Ўзбекистон Республикасида олий таълим тўғрисидаги ҳужжат деб тан олинадиган дипломи берилиши қайд этилди.
Изоҳ (0)