Microsoft ўзига тегишли бўлган Nokia мобил бўлинмасининг номини ўзгартиришга қарор қилди. Унинг янги номи энди корпорация номи билан янада яқинроқ – Microsoft Mobile бўлади. Microsoft бу хусусда ҳозирча расмий эълон берганича йўқ, бироқ компания ўз ҳамкорларини номнинг қисқа фурсатларда ўзгариши ҳақида огоҳлантирган.
Ҳозирда фин мобил компаниясининг расмий номи – Nokia Oyi (ушбу финча қисқартма от акциядорлик жамияти маъносини англатади). Яқин келажакда барча молиявий операциялар учун Microsoft Mobile Oy номи қўлланилади (Oy – корпорация маъносини англатади). Бу ҳақда Mail.ru хабар берди.
Компания смартфонлари аввалгидек Nokia бренди остида ишлаб чиқарилиши тахмин қилинмоқда. Чунки бу шу қадар таниқли ва машхур номки, унинг ўзгартирилиши мантиқан хато бўлиши муқаррар. Бўлинма номининг ўзгартирилиши эса фин компанияси Microsoft корпорациясининг тенг ҳуқуқли қисмига айланиб улгурганини яна бир бор тасдиқлайди.
Microsoft'нинг Nokia мобил бизнесини сотиб олиши ҳақидаги режалари ҳақида 2013 йил сентябрь ойида эълон қилинган эди. Nokia'нинг қурилмалар ишлаб чиқариш ва хизматларни ривожлантириш билан шуғулланувчи бўлинмаси, шунингдек, улар билан боғлиқ патентлар нархи 5,44 миллиард еврога баҳоланган эди. Финляндия компаниясининг ўзи уч йўналиш – телекоммуникацион жиҳозлар, карталар ва Here навигация сервисини ишлаб чиқаришга урғу бериш истагини билдирган.
Мазкур «телефон» бизнеси харидини Microsoft ўзининг биринчи рақамли смартфонлар ишлаб чиқарувчига айланиш ва смартфонлар бозоридаги улушини тўрт баравар кўпайтириш истаги билан изоҳлаган. 2018 йилга келиб, корпорация бу кўрсаткични 15 фоизга етказишни режалаштирган. Nokia'нинг патентлар портфели харидини эса Microsoft АТ секторидаги энг қимматли, дея эътироф этган.
Изоҳ (0)