Наманган тумани бандликка кўмаклашиш ва аҳолини ижтимоий муҳофаза қилиш маркази, туман ҳокимлиги, прокуратура, «Камолот» ёшлар ижтимоий ҳаракати туман кенгаши ҳамкорлигида меҳнат ярмаркаси ўтказилди. Бу ҳақда ЎзА хабар берди.
Унда 70 корхона, ташкилот ва муассаса 360 дан зиёд бўш иш ўрни билан иштирок этди. Жумладан, «Рисолат таъмир қурилиш» хусусий корхонаси, «МРТ Текстил» қўшма корхонаси, туман халқ таълими бўлими муассасалари томонидан ўнлаб иш ўринлари таклиф этилди.
Тадбирда 93 нафар фуқарога ишга кириш учун йўлланма берилди. Иштирокчилар меҳнат, ижтимоий муҳофаза қонунчилиги, яратилаётган иш ўринлари ҳақида батафсил маълумотга эга бўлди.
– Ирвадон ижтимоий касб-ҳунар коллежининг мактаб ва синфдан ташқари тарбия ишлари йўналишида таҳсил олмоқдаман, – дейди ярмарка иштирокчиси Шаҳодат Орипова. – Яқинда мутахассислик дипломи қўлимизга тегади ва мен олдиндан иш ўрним тайин бўлганидан жуда хурсандман. Тумандаги 33-мактабгача таълим муассасасига ишга йўлланма олдим.
Изоҳ (0)