Нодавлат телекўрсатувлар ва радиоэшиттиришлар объектларига ҳужум бўлганда, уларни эгаллаб олиш учун таҳдид қилинганда ёки асбоб-ускуналаридан рухсат берилмаган тарзда фойдаланишга уринилганда тасдиқланган йўриқномалар ва схемалар бўйича уларни ишдан чиқариш чора-тадбирлари кўрилади. Бу талаб Телекўрсатувлар ва радиоэшиттиришлар объектларини қўриқлаш, муҳофаза қилиш ҳамда уларнинг хавфсиз фаолият кўрсатиши қоидаларида келтирилган, деб хабар беради «Кун».
Қоидалар Ўзбекистон ҳукуматининг 14 апрелдаги қарори билан тасдиқланган. Қарор матни 21 апрель куни Lex.uz тизимида эълон қилинган (pdf).
Қоидаларга кўра, нодавлат теле- ва радиоканаллар объектлари қўриқлаш учун ИIV ҳузуридаги «Қўриқлаш» бирлашмасига берилиши керак, каналларнинг кириш чекланган хоналари эса «мажбурий тартибда» ички ишлар органлари ҳузуридаги техник қўриқлаш ва ҳаракат қилиш пунктлари (ПТОР)га «қўриқлаш учун» топширилиши керак.
Теле- ва радиоканаллардаги кириш чекланган хона орқали транзит қувурлар, ҳаво киритгичлар ва бошқа коммуникацияларни ўтказиш қатъиян тақиқланади. Шунингдек, каналларнинг алоҳида жойлашган бинолари ҳудуди баландлиги камида икки метр бўлган бетон ёки ғишт тўсиқ билан ўралиши белгилаб қўйилган.
«Зарур ҳолларда, аҳоли пунктларининг меъморий кўринишини ўзгартиришга чеклашлар мавжуд бўлган тақдирда Миллий хавфсизлик хизмати, ИИВ, Давлат ёнғин хавфсизлиги хизмати (ДЙХХ) органлари билан келишилган ҳолда бео ва ғишт тўсиқларини декоратив металл панжара девор билан алмаштиришга йўл қўйилади», — дейилади қоидаларда.
Қоидаларга асосан, нодавлат теле- ва радиоканаллар белгиланган рўйхат бўйича махсус ҳужжатларни ишлаб чиқиши, ушбу ҳужжатлар эса биринчи галда МХХ, сўнг ИИВ, ДЙХХ, Алоқа, ахборотлаштириш ва телекоммуникация технологиялари давлат қўмитаси ҳамда ФВV билан келишилган ҳолда тасдиқланиши керак.
Бундан ташқари, нодавлат телекўрсатувлар ва радиоэшиттиришлар объектларида кириш тартиби ва объектнинг ички тартиби белгиланади.
Ўзбекисон Матбуот ва ахборот агентлигининг 2014 йил 1 январь ҳолати бўйича маълумотларига кўра, Ўзбекистонда теле- ва радиоканал сифатида рўйхатдан ўтган ОАВлар сони 95та бўлиб, теле- ва радиоканалларнинг (ОАВ сифатида рўйхатдан ўтган веб-сайтларни қўшиб ҳисоблаганда) 78 фоизи нодавлат ОАВ ҳисобланади. Ўзбекистон Электрон ОАВ миллий ассоциацияси сайтида 30 га яқин нодавлат теле- ва радиоканалларнинг рўйхати келтирилган.
Изоҳ (0)