Вашингтондаги Оқ уй ҳудудида тулки пайдо бўлди. Уни қоровуллар, шунингдек, АҚШ Махфий хизмати агентлари ҳам тута олмаяпти, деб ёзади «ITAR-TASS».
Маҳаллий ОАВнинг хабар беришича, тулки Оқ уй ҳудудига кузда мамлакатда иқтисодий инқироз кузатилган вақтда, кўпгина давлат хизматчилари, уларнинг ичида президент назоратчилари ҳам пул тўланмайдиган таътилга чиқиб кетганида келиб қолган. Шу пайтгача жонивор Оқ уй қўриқчиларини кўп марта ташвишга солган. Бир куни тунда тулки Мишел Обаманинг полизини вайрон қилган.
Уни жуда кам одам кўрган. Обама ёрдамчиларининг сўзларига кўра, тонг саҳарда президентнинг ўзи кабинети деразасидан тулкининг думини кўриб ҳайрон қолган. Бошқа сафар Оқ уй матбуот котиби ўринбосари Жош Эрнест кеч бўлганда ишдан кетаётиб, қоронғуда бир нарсанинг ҳаракат қилганига кўзи тушган. Аввалига Эрнест бу мушук бўлса керак, деб ўйлаган, аммо кейин унинг тулки эканлигини англаган.
Оқ уй ҳудудининг майдони 7,3 гектарни ташкил этади. Худди Вашингтоннинг бошқа истироҳат боғларидаги каби бу ерда олмахонлардан ташқари, вақти-вақти билан турли хил ҳайвонлар учраб туради.
Билл Клинтон раҳбарлиги пайтида эса Оқ уй панжараларидан бир неча буғу сакраб ўтган. Бу ерда қушлар ҳам кам эмас: вақти-вақти билан ғозлар ва ўрдаклар, шунингдек, тонгда сайраб Ричард Никсонни уйғотадиган чуғурчуқлар ҳам учраб туради. Уларни қўрқитиш учун, ҳаттоки, хизматчилар жўнатилди. Кейинроқ эса бунинг учун овозли сигнал берувчи махсус мосламалар ўрнатилди.
Изоҳ (0)