Бугун КХДРда миллий байрам — Ким Ир Сен таваллудининг 102 йиллигини нишонлашди. Шу муносабат билан Ким Чен Ин отаси ва бобосининг қабри жойлашган Кимсусан саройини зиёрат қилди. Бу ҳақда «ИТАР-ТАСС» хабар берди.
Ўтган йили парламент депутатлари барча корейсларга «ушбу буюк иншоотни муқаддас ибодатхона ва бутун миллатнинг ғурури деб билиш» мажбуриятини юкловчи қарорни тасдиқлаган эди.
Корея халқ армияси (КХА) Бош сиёсий бошқармаси раҳбари Чхе Рён Хе, КХА бош қароргоҳи раҳбари Ли Ён Гил, миллий қуролли кучлар вазири Чан Чон Нам ва бошқалар ҳам Ким Чен Ин зиёратида ҳамроҳлик қилишди.
Шунингдек, мамлакатда байрамга бағишлаб «Апрель баҳори» халқаро фестивали ўтказилди. Дунёнинг турли бурчакларида яшовчи корейслар ҳам шу куни ватанларини зиёрат қилиб кетишди.
Мамлакат пойтахтида «‘Ким-ир-сенчасига’ яшаймиз ва курашамиз!» шиори остида намойишлар ва йиғилишлар ўтказилди.
Ким Ир Сен КХДР вазирлар маҳкамаси раиси лавозимини 1948—1972 йилларда эгаллаган, ундан кейин президентликка сайланган. 1994 йилда вафот этгач, Ким Ир Сен КХДРнинг абадий президенти дея эълон қилинган.
Изоҳ (0)