«Олтин қалам» IX Миллий мукофотига ижодий ишларни қабул қилиш якунланди. 490 нафарга яқин журналист танловга газета, журналларда чоп этилган, теле ва радиоэфирга узатилган 7,4 мингта ижодий ишини ва интернет-нашрларни тақдим этди, деб ёзади ЎзА.
Ўзбекистонда Жаҳон матбуот эркинлиги куни — 3 май арафасида «Олтин қалам» Миллий мукофоти учун халқаро танлов ўтказиш яхши анъанага айланган. Танлов ўтказиб келинаётгандан буён 3,4 минг нафарга яқин журналист ўзининг 50,5 мингдан зиёд ижодий ишини тақдим этди. Ўтган даврда Ўзбекистон оммавий ахборот воситаларини ривожлантиришга катта ҳисса қўшган, юксак маҳоратини намойиш этган 194 нафар журналист ғолиб ва совриндор бўлди
— «Олтин қалам» Миллий мукофоти учун ижодий танлов сифати ва кўлами йил сайин кенгайиб бормоқда, — дейди Ўзбекистон Журналистлари ижодий уюшмаси раиси Шерзод Ғуломов. — Дастлабки йили унда 1669 ижодий иш билан 136 журналист иштирок этган бўлса, ўтган йили «Олтин қалам» VIII Миллий мукофоти учун ўтказилган танловда 410 нафар журналист қатнашиб, 6400 дан зиёд ижодий иш тақдим этилди. Мукофот жамғармаси 2006 йилда 11,2 миллион сўмни ташкил қилган бўлса, бу йил 181 миллион сўмга етди.
Журналистик материалларни танлаб олишда нафақат уларнинг сифати, балки Ўзбекистонда амалга оширилаётган ижтимоий-сиёсий ва социал-иқтисодий ислоҳотлар, демократик ҳуқуқий давлат ҳамда кучли фуқаролик жамияти барпо этишнинг мазмун-моҳиятини тезкор, холис ва ишончли акс эттириш танловнинг асосий мезонига айланди. Ғолиблар, одатдагидек, бош мукофот ва тўртта асосий номинация (босма оммавий ахборот воситалари, телевидение, радио ва интернет-журналистика) бўйича аниқланади.
Ғолиб ва совриндорлар диплом, «Олтин қалам» кўкрак нишони, статуэткаси ва пул мукофоти билан тақдирланади. БМТ, ЮНЕСКО, ЕХҲТ, Жаҳон банки, «Минтақавий мулоқот» ташкилотининг (Словения) Ўзбекистондаги ваколатхоналари ўзлари таъсис этган рағбатлантирувчи мукофотларни топширади.
Изоҳ (0)