Россиянинг Олютор тумани Тиличики қишлоғи Скритая кўрфазида тўққизинчи синф ўқувчиси муз тагидан беш кишини қутқариб қолди. Уларнинг тўрттаси ўсмир бўлган, деб хабар берди «ИТАР-ТАСС».
Камчатка Ички ишлар вазирлиги бошқармаси матбуот хизмати ходими Елена Овчинникованинг маълум қилишича, сайр вақтида йигитча қирғоқдан тахминан 150 метр масофада қорда юрадиган машина муз тагига чўкаётганини кўрган.
Мактаб ўқувчиси ўзини йўқотиб қўймаган, полицияга телефон қилган. Кейин дарҳол иккита йўғон арқон олиб музни тешиб, уларга ёрдам беришга ҳаракат қилган, — деб қўшимча қилди бошқарма ходими.
Йигит сувдан жабрланувчиларни биттадан чиқариб олаётганида, унга ёрдам бериш учун Тиличики бўлими полицияси келган. Биргаликда барчани қутқариб олишга эришилди.
Жабрланувчилар яқин жойдаги полиция участкасига етказилди ва уларга иссиқ кийимлар ҳамда чой берилди. Қутқарилганлар совуқ сувда узоқ вақт қолмагани туфайли ҳеч кимга тиббий ёрдам зарур бўлмади.
Тиличики қишлоғида истиқомат қилувчи 28 ёшли жабрланувчининг сўзларига қараганда, у 14—17 ёшларда бўлган ўсмирлар билан қорда юрадиган машинада сайр қилишни хоҳлаган. Улар кўрфазда автомобилларнинг изидан юрган, кутилмаганда машина муз тагига чўкишни бошлаган. Кейинроқ, уни уч метр чуқурликдан қирғоққа чиқариб олишган.
Изоҳ (0)