Россия кутубхоналари «Википедия»га муқобил электрон энциклопедия яратади

Россия кутубхоналари ўзларининг электрон энциклопедик ресурсини яратишмоқчи; у «Википедия»га рақобатчи бўлиши кутилмоқда. Бу ташаббусни Санкт-Петербургдаги Президент кутубхонаси олимлар кенгаши йиғилишида Россия миллий кутубхонаси бош директори Антон Лихоманов маълум қилди, деб ёзади «ИТАР-ТАСС».

«Россиянинг йирик миллий кутубхоналари ўз электрон ахборот ресурсларини яратиш устида ўйласалар бўлар эди», – деди Лихоманов.

Йиғилиш қатнашчилари таъкидлашича, дунёдаги энг оммабоп электрон кутубхонада жуда кўп ноаниқликлар мавжуд. Бунинг устига, «геосиёсатга алоқадор кўплаб фактлар унда нохолис акс эттирилиши ҳоллари учрайди». Бу ҳақда Россия Президент кутубхонасининг ижтимоий алоқалар ва оммавий ахборот бўйича директори Валентин Сидорин маълум қилган.

Президент кутубхонаси бош директори Александр Вершинин миллий электрон энциклопедик ресурс яратиш фикрини қўллаб-қувватлади. У бу борада иш аллақачон бошланганини эслатиб, унга қайтиш ва шу йўналишни давом эттириш лозимлигини таъкидлади. Ўтган йилнинг охирида Президент кутубхонаси «Россия ҳудудий энциклопедиялари» порталини яратишда иштирок этишини маълум қилган эди. Портал ҳудудлар ҳаётининг турли жиҳатлари ҳақидаги босма маълумотномаларни бирлаштириши лозим эди.